បន្ទាប់ពីសម្រាកមួយរយៈ និងរៀបចំ​ខ្លួនជាមួយស្នាដៃថ្មីៗរួចមក ពេល​នេះ​ក្រុម​តន្ត្រី SUFFER ក៏បាន​បង្ហាញ​មុខវិញហើយ។

នៅថ្ងៃទី២១ ខែឧសភា ឆ្នាំ២០២២ នេះ​ កម្មវិធីមួយបាន​បង្ហាញ​រូបរាង​ក្នុងរោងភាពយន្ត Major Cineplex នៃផ្សារទំនើបអ៊ីអនសែនសុខ ដែលជា​ការ​ចាក់បញ្ចាំង​វីដេអូឯកសារ «ជីវិត៣តន្ត្រីតែមួយ» របស់ក្រុម​តន្ត្រី SUFFER។ កម្មវិធីនេះដែរ ជាការរៀបចំដោយ ផលិតកម្មរណ្ដំ ដោយរៀបរាប់អំពីខ្សែជិវិតជាតន្រ្តីករនិងជាសិល្បៈករចម្រៀងរបស់បងប្អូនប្រុសចំនួនបីនាក់នៃក្រុមតន្រ្តីផប់រ៉ក SUFFER ។ការចាក់ផ្សាយជាផ្លូវការនេះ មានការចូលរួមពីក្រុមគ្រួសារ សិល្បៈករផ្សេងៗ រួមទាំងអ្នកគាំទ្រ (ហ្វេនៗ)។

ទន្ទឹមនឹងនេះដែរ «រណ្តំ - RONDOM» និង ក្រុមតន្រ្តី SUFFER ក៏បានប្រកាសចេញផ្សាយអាល់ប៊ុមថ្មីចំណងជើងថា៖ «Three Brothers» បង្ហាញពីក្ដីស្រម៉ៃ និងភាពអត់ធ្មត់ ដែលប្រិយមិត្ត និងអ្នកគាំទ្រក្រុម SUFFER ទាំងអស់អាចស្ដាប់បទចម្រៀងទាំងអស់នេះនៅលើ Pleng បានផងដែរ។ ក្នុងអាល់ប៊ុមនេះដែរ មានចម្រៀងចំនួន ៧បទ បែបផប់រ៉ក (pop rock) បង្ហាញពីភាពតស៊ូ អត់ធ្មត់ និងក្ដីស្រម៉ៃនានាក្នុងនាមជាបងប្អូនប្រុសបីនាក់ដែលចូលចិត្តស្រលាញ់តន្រ្តីដូចគ្នានិងបានធ្វើការរួមគ្នាលើវិថីតន្រ្តីជាលក្ខណៈក្រុមអស់រយៈពេលជាង១០ឆ្នាំកន្លងមក ទោះបីជាមានឧបសគ្គ និងកត្តារាំងស្ទះយ៉ាងណាក្ដី។ មានឪពុកជាសិល្បៈករលេងឧបករណ៍តន្រ្តីសម័យទំនើបលោកសុខ សារិន (ទទួលអនិច្ចកម្ម) និងអ្នកម្ដាយរុន សារ៉េតជាសិល្បៈករចម្រៀង សមាជិកក្រុមតន្រ្តី SUFFER រួមមាន លោកសុខ សារ៉ាដាំ ជាអ្នកលេងហ្គីតាបាស់ លោកសុខ សារ៉ាដា ជាដៃស្គរ និងលោកសុខ សារ៉ាដែនជាអ្នកចម្រៀង និងអ្នកលេងហ្គីតាផងដែរ។តាំងចិត្តចែករំលែកបទពិសោធន៍ជិវិត និងការអត់ធ្មត់ក្នុងនាមជាសិល្បៈករ និងពួកគេ។

ជាមួយគ្នានោះ ការប្រកាសនៅពេលនោះ បាន​បញ្ជាក់ថា ក្រុមតន្ត្រីមួយនេះ​នឹង​មាន​ការប្រគំតន្ត្រីសម្ពោធអាល់ប៊ុមថ្មីជាពិសេសរបស់ខ្លួនមានឈ្មោះថា «THREE BROTHERS» ​បង្ហាញពីក្ដីស្រម៉ៃ និងភាពអត់ធ្មត់ នៅ​ថ្ងៃទី១២ ខែមិថុនា ឆ្នាំ២០២២ នៅផ្សារទំនើបអ៊ីអនសែនសុខ ចាប់ពីម៉ោង ៦ល្ងាចតទៅ។

ក្រុម​តន្ត្រី​ SUFFER គឺជាក្រុមបុរសដែល​មាន​​សមាជិកទាំងអស់ ៣នាក់ ដែលស្ថិតនៅក្រោម​ការគ្រប់គ្រងរបស់ក្រុមហ៊ុនថតចម្រៀង រណ្ដំ។ ផលិតកម្ម​នេះ​ដែរ ត្រូវ​បាន​គេ​ស្គាល់ច្បាស់​ថាជា ផលិតកម្មដែល​មាន​ស្នាដៃក្នុងការផលិតការប្រគំតន្ត្រី ផលិតវីដេអូ ក៏ដូចជា ជាអ្នកគ្រប់គ្រងតារាចម្រៀងជា​ច្រើនរូបរួមមាន កញ្ញា ចិត្ត កញ្ចនា ក្រុមចម្រៀង SUFFER និងកញ្ញា សារា វីតា ជា​ដើម៕