តារាសម្ដែងប្រុស រ៉េននី តារា និយាយថាកាលលោកចូលសិល្បៈដំបូងៗមានអ្នកធ្វើការជាមួយគ្នាពីរបីនាក់ តែងតែឌឺដងឲ្យលោក ហើយពេលលោកមានរឿងអីបន្ដិចបន្ដួចចាំតែជាន់ពន្លិច។ ប៉ុន្ដែលោកថា បច្ចុប្បន្នអ្នកធ្លាប់មើលងាយលោក ពុំមានជោគវាសនាល្អលើសលោកឡើយ។

តារារូបនេះ បានបញ្ចេញរឿងលាក់ទុកក្នុងចិត្ដរបស់លោកតាមបណ្ដាញសង្គមIG នៅរសៀលថ្ងៃទី២១ ខែមេសា ថា លោកអគុណចំពោះបងប្អូន និងមិត្ដភក្ដិដែលស្រឡាញ់រាប់អានលោកដោយស្មោះ ហើយក៏ចង់សួទៅអ្នកធ្លាប់មើលងាយលោកវិញបានដើរទៅដល់ណាហើយ។

រ៉េននី តារា៖ “ខ្ញុំប្រឹងដោយខ្លួនឯង ទិញបានឡានពីរ និងផ្ទះមួយហើយ…តើមនុស្សពីរបីនាក់នោះទៅដល់ណាហើយ? ប្រហែលជាអត់កំណើតទេ ព្រោះចាំតែជាន់ពន្លិចគេ ភ្លេចមើលការងារខ្លួនឯង"។

ក្រោយពីបញ្ចេញសារដោយមានភ្ជាប់សកម្មភាពដើរម៉ូតរបស់លោកនៅក្នុងកម្មវិធីមួយ ក៏មានអ្នកគាំទ្រលោកចេញមកអបអរសារទរចំពោះជោគជ័យលើវិថីសិល្បៈរបស់លោករហូតដល់មានលទ្ធភាពទិញឡាន និងផ្ទះ។ ទោះជាយ៉ាងណាលោកមិនបានបញ្ជាក់ថា ឡានពីរគ្រឿងដែលលោកទើបទិញនោះ មានម៉ាកអ្វីខ្លះ និងផ្ទះមួយខ្នងស្ថិតនៅទីតាំងណា ហើយទិញអស់ប៉ុន្មានក៏មិនទាន់បញ្ចេញដែរ៕